АҚШ-тың Израильге қосымша әскери көмегінің бірінші партиясы жолда
Қазіргі уақытта Израильдің айналасында болып жатқан оқиғалар туралы Arbat.media хабарлайды.
▪️ Қазанның 7-сі күні Хамас содырлары шабуыл жасаған Газа секторы маңындағы Nature Party музыкалық фестивалі өтетін жерден өлтірілген 260 израильдіктің денесі табылды. Бұл туралы The Jerusalem Post сайты ZAKA ерікті ұйымына сілтеме жасап хабарлайды. Дәл осы фестиваль өтетін жерден неміс азаматы Шани Лукты содырлар ұрлап әкеткен.
▪️ Израиль армиясы сенбі және жексенбі күндері Газа секторына 800 әуе соққысы жасалғанын хабарлады. Израиль әскерилерінің айтуынша, соңғы соққылардың бірі ХАМАС-қа тиесілі Ұлттық ислам банкінің ғимаратына соғылса, екіншісі содырлардың командалық пунктін қиратты.
▪️ Палестиналық исламдық жиһад ұйымы Израильдің 30 азаматын кепілде ұстағанын хабарлады. Ұйым жетекшісі Зияд әл-Нахала кепілге алынғандар сол жерде ұсталған палестиналықтар Израиль түрмелерінен босатылған жағдайда ғана үйіне оралатынын айтты.
▪️ Палестина ұлттық әкімшілігі Иордан өзенінің батыс жағалауында Израиль әскерімен қақтығыста 11 палестиналықтың қаза тапқанын хабарлады. Израиль қарулы күштері бұл ақпаратқа әзірге түсініктеме берген жоқ.
▪️ АҚШ президенті Джо Байден Израиль премьер-министрі Биньямин Нетаньяхуға телефон арқылы АҚШ-тың қосымша әскери көмегінің бірінші партиясы жолда екенін және АҚШ таяу күндері тағы да жіберетінін айтты.