Ауғанстанда әйелдерді ұруға рұқсат берілді

Ауғанстанда «Талибан» билігі әйелдерге күш қолдануға рұқсат берді, деп хабарлайды Arbat.Media.

Сарапшылар құжаттағы бірқатар баптар тұрмыстық зорлық-зомбылықты заңдастырып, әйелдер мен балалардың негізгі құқықтарын айтарлықтай шектейтінін ескертті.

Әсіресе ерлі-зайыптылар арасындағы зорлық-зомбылық мәселесіне арналған 32-бап үлкен наразылық тудырып отыр. Аталған бапқа сәйкес, әйелін «күш» қолдану арқылы ұрған күйеуі бар болғаны 15 тәулікке қамауға алынуы мүмкін. Бұл жаза әйел сотта зорлық-зомбылықты дәлелдей алған жағдайда ғана қолданылады, яғни сот денесіндегі жара, сынық, көгерулерді ғана есепке алады.

Кодекс жеке адамның құқықтарынан гөрі патриархалды жүйені және идеологиялық қысымды жоғары қояды. Ол әйелдердің жүріп-тұруын, қарым-қатынастарын, отбасылық шешімдерін және жеке сенімдерін қатаң реттейді.

Сондай-ақ, діннен «бас тартқандарға» қатысты да аса қатал шаралар көзделген. 58-бапқа сәйкес, ислам дінінен бас тартқан әйелдер өмір бойына бас бостандығынан айырылып, тәубеге келіп, исламға қайта оралғанға дейін әр үш күн сайын 10 рет қамшы соғу жазасына кесілуі мүмкін. Ал ер адамдарға қатысты өзге тәртіп қолданылады: ханафи құқық нормалары бойынша оларға тәубеге келу үшін үш күнге дейін уақыт беріледі, содан кейін өлім жазасы қолданылуы мүмкін. Құқық қорғаушылар мұны заңды қолданудағы айқын кемсітушілік деп бағалайды.