Чилиде аза тұту күні жарияланды
Чилидің бұрынғы президенті, 74 жастағы Себастьян Пиньера тікұшақ апатынан қайтыс болды, - деп хабарлайды Arbat.media.
Бұл туралы Чили Ішкі істер министрлігінің басшысы Каролина Тоа өзінің X-тегі ресми парақшасында хабарлады.
Чилидің қазіргі президенті Габриэль Борич ұлттық аза тұту жариялап, мемлекеттік деңгейде жерлеу рәсімін өткізуге бұйрық берді.
«Мен Чилидің екі рет сайланған президентін еске алу үшін үш күндік аза тұту жарияладым. Мен Сыртқы істер министрі Альберто Ван Клаверенді жерлеу комиссиясына жауапты етіп тағайындадым», — делінген мемлекет басшысының мәлімдемесінде.
Оқиға Лаго Ранко муниципалитетінің аумағында болғаны атап өтілді. Тікұшақты өзі басқарған Пиньера қатты жаңбыр кезінде басқаруды жоғалтып, Ранко көліне құлаған. Тікұшақта бұрынғы мемлекет басшысынан бөлек тағы үш адам аман қалып, жағаға шығып үлгерген. Жедел қызмет Себастьян Пиньераның денесін судан тапты.
Анықтама үшін: Консерватор Себастьян Пиньера екі рет, 2010-2014 және 2018-2022 жылдары Чилидің президенті болған.