Миллиондар мұрагері ақшаны кездейсоқ таңдалған адамдар арқылы таратпақшы

Марлен Энгельхорн - BASF неміс химиялық концернінің негізін қалаушының шөбересі. Миллиондардың мұрагері ақшаны кездейсоқ таңдалған адамдар арқылы таратпақшы, - деп хабарлайды Arbat.media. 

Қыз Венада тұрады, бірақ оның екі төлқұжаты бар - австриялық және неміс. Бір жыл бұрын миллиондаған долларды құрайтын мұраға ие болатыны белгілі болғанда, ол мұны әділетсіздік деп санап, салық салуды талап еткен, бірақ бұған қол жеткізген жоқ.

«Бірнеше бай адамның пропорционалды емес ықпалынан» демократияға қауіп төніп тұр, дейді Энгельхорн.

Нәтижесінде ол мұрасының көп бөлігін, яғни 25 миллион еуроны басқа адамдар басқаруы керек деп шешті.

Схема келесідей: 16 жастан асқан кездейсоқ таңдалған 10 мың австриялық азамат сауалнаманы толтыруға шақырылады, содан кейін жауап бергендердің арасынан сарапшылар «Австрия халқының құрамын жақсы көрсететін 50 адамды таңдайды».
 
Жоба «Қайта бөлу бойынша жақсы кеңес» деп аталды.

Қатысушылар ақшаны кімге аудару керектігін анықтап қана қоймай, жалпы Австриядағы активтерді қайта бөлу туралы идея ұсынуы керек.