113 келі есірткі тәркіленді: Алматыға есірткі тасымалдаған ағайындылар қолға түсті

Алматы полициясы Жамбыл облысынан қалаға есірткі жеткізу арнасының жолын кесті,деп хабарлайды Arbat.Media.

Арнайы жасақтың көмегімен Жамбыл облысының екі тұрғыны – бұрын есірткі қылмыстары үшін сотталған ағайынды екі адам Алатау ауданында қолға түсті.

Тәртіп сақшылары үйдің аумағын тінту кезінде есірткі жасырылған арнайы орындарды анықтады. Тексеру нәтижесінде екі қорап пен үш пакет есірткі, сондай-ақ каннабис тобына жататын 26 түп өсімдік тәркіленді.

Сараптама қорытындысы бойынша, алынған заттардың жалпы салмағы 113 келіден асқан. Оның ішінде 100 келіден астам кептірілген марихуана мен 13 келіден астам гашиш бар болып шықты.

Қазіргі уақытта екі күдікті де уақытша ұстау изоляторына қамалды. Полиция қызметкерлері бұл қылмыстық айналымға қатысы болуы мүмкін басқа да адамдарды анықтау бағытында тергеу амалдарын жалғастырып жатыр.