Әкесі мен баласы 77 бас жылқы ұрлады деген күдікке ілінді
Ақмола облысында 77 бас жылқыны ұрлады деген күдікпен Степногорск қаласының екі тұрғыны - әкесі мен ұлы ұсталды, деп хабарлайды Arbat.Media.
Мал иесіне келтірілген шығын 25 млн 450 мың теңгеге бағаланған.
Жылқылардың жоғалғаны туралы арыз полицияға биыл мамыр айында түскен. Мал Ерейментау ауданындағы ауылдардың бірінің маңында еркін жайылымда жүрген. Осы дерек бойынша қылмыстық іс қозғалып, бірнеше ай бойы іздестіру жұмыстары жүргізілген.
Тергеу нұсқасына сәйкес, күдіктілер көктемде жылқыларды көлікпен Степногорск қаласына жеткізіп, қала сыртындағы қораларда ұстаған. Кейін малды біртіндеп сатқан деген күдік бар.
Күдіктілер ұсталғаннан кейін 40-тан астам жылқы иесіне қайтарылды. Қазіргі уақытта әкесі мен баласы қамауда отыр. Қылмыстық іс бойынша тергеу жалғасып жатыр.
Полиция мал иелеріне жануарларды қараусыз қалдырмай, жайылымдарды тұрақты тексеріп отыруды ескертті.