Алматы әкімі бокстан әлем чемпионатының жүлдегерлерін марапаттады
Алматы әкімі Дархан Сатыбалды әлем чемпионатының алтын, күміс және қола жүлдегерлерін жоғары жетістігі үшін құттықтап, қаржылай сертификаттармен марапаттады, деп хабарлайды Arbat.Media.
Салтанатты рәсімде Алматы әкімі Дархан Сатыбалды спортшыларды жоғары нәтижесімен құттықтап, алғыс хат пен қаржылай сертификаттар табыс етті.
"Сіздерді осы жарқын жеңістеріңізбен құттықтауға рұқсат етіңіздер. Бұл – мен үшін қос қуаныш, өйткені біздің алматылық спортшылар ұлттық құраманың қоржынына 4 медаль салды. Бұдан бөлек, күрес чемпионатында тағы бір медальға қол жетті. Мұның бәрі – сіздермен бірге мақтанатын жоғары нәтиже", - деді қала әкімі.
Сондай-ақ Загреб (Хорватия) қаласында өткен күрестен әлем чемпионатында қола жүлдеге ие болған Нұрқожа Қайпанов та алғыс хат және қаржылай сертификатпен марапатталды. Спортшылардың бапкерлері де алғыс хат пен қаржылай ынталандыруға ие болды.
