Алматыда екі AI-орталық ашылады

Алматыда білім беру, ғылыми зерттеулер, стартаптар мен технологиялық компанияларды біріктіретін Almaty AI Hub және Almaty AI Park жобалары жүзеге асырылып жатыр, деп хабарлайды Arbat.Media.

Almaty AI Hub Көктем-3 шағынауданындағы аумағы 9,4 мың шаршы метрден асатын ғимаратта орналасады. Мұнда IT және AI компанияларына, стартаптар мен әзірлеушілерге арналған кеңістіктер, коворкинг, білім беру алаңдары және конференц-залдар болады. Сондай-ақ хабта Tomorrow School мектебі мен AI Campus инфрақұрылымы орналастырылады.

Ал Almaty AI Park 4,9 гектар аумақта салынады. Мұнда AI зертханалары, кеңселер, коворкинг, акселератор, бизнес-инкубатор және университет орналасады. Жоба екі кезеңмен жүзеге асырылады. Бірінші кезеңі 2027 жылғы желтоқсанда, екіншісі 2028 жылғы желтоқсанда аяқталады.