Алматыда самокат айдаушыларға қойылатын талаптар күшейтілді

Алматыда полицейлер кикшеринг компанияларының өкілдерімен қаладағы электросамокаттарды пайдалану мәселесін талқылады, деп хабарлайды Arbat.Media.

Алматы қалалық полиция департаментінің мәліметінше, кездесу барысында электросамокаттарды дұрыс пайдалану және қолданушылардың тәртібі мәселелері көтерілген. Атап айтқанда, жол қозғалысы ережелерін бұзу жағдайлары, тротуармен жүру, жылдамдықты асыру және жаяу жүргіншілерге кедергі келтіретін әрі қауіп төндіретін ретсіз тұрақтар сөз болған.

Алматы ПД бастығының орынбасары Ғалым Саргулов кешенді тәсілдің маңыздылығын және сервистер тарапынан жауапкершілікті арттыру қажеттігін атап өтті. Оның айтуынша, пайдаланушыларды бақылауды күшейту, технологияларды енгізу және құқық бұзушылықтардың алдын алу маңызды.

«Сондай-ақ арнайы тұрақ аймақтарын ұйымдастыру және самокаттарды ретсіз орналастыруға жол бермеу мәселесі талқыланды. Өрескел құқық бұзушылықтар кезінде самокаттар мен басқа да жеке қозғалыс құралдары айыппұл тұрағына жіберіліп, ал заң бұзушылар жауапкершілікке тартылады», – деп хабарлады полиция.