Астанадағы балабақшада бүлдіршін қатарласын соққыға жықты

Астана тұрғыны баласының балабақшада өзге тәрбиеленушілердің тарапынан соққыға жығылғанын мәлімдеді, деп хабарлайды Arbat.Media.

Анасының айтуынша, тәрбиешілер шағымдарға назар аудармай, болған жағдайды «балалардың ойыны» деп түсіндірген.

«9–15 қыркүйек аралығында екі бала ұлымның басынан аяқ киіммен ұрып, мазақ етіп, ауынан тепкіледі (сүндетке отырғызылғанына бір ай да болмаған), буындырып, дем ала алмай қалған сәттері бейнежазбада көрінеді. Сондай-ақ оны қатты ұрған», – деді жәбірленуші баланың анасы.

Оқиғадан кейін бала ұйықтай алмай, психологиялық жарақат белгілері байқалған.

Ата-анасы полицияға шағым түсірді. Қазір қылмыстық іс қозғалып, тергеу жүріп жатыр. Балабақша басшылығы баланың жыламағанын және жарақат алмағанын алға тартты.