Астанадағы мектептердің бірінде қыздар төбелесті

Астанадағы №36 мектепте оқушылар арасында болған төбелестен кейін ата-аналар оқу орнындағы ахуалдың ушығып кеткенін мәлімдеді. Олардың айтуынша, мектеп әкімшілігі балаларға қысым көрсеткен, деп хабарлайды Arbat.Media.

Таралған үндеуге сәйкес, жанжалдан кейін мектеп басшылығы оқиғаны толық әрі объективті тексерудің орнына, жоғары сынып оқушыларының телефондарындағы бейнежазбаларды өшіруге тырысқан болуы мүмкін. Ата-аналардың пікірінше, мұндай әрекет жағдайды ушықтырып, білім ордасындағы сенімге селкеу түсірген.

Оқушылар да әкімшілік тарапынан қысым болғанын айтып, бұл жағдай мектептегі психологиялық ахуал мен қауіпсіздік сезіміне кері әсер еткенін жеткізген.

«Біз, ата-аналар, қалыптасқан жағдайдан шаршадық. Мектеп директоры қауіпсіз әрі ашық білім беру ортасын қамтамасыз ете алмай отыр деп есептейміз. Оны қызметінен босатуды талап етеміз», – делінген мәлімдемеде.

Ал қалалық білім басқармасының мәліметінше, төбелеске қатысқан оқушылар мектепішілік есепке алынған. Олармен профилактикалық жұмыстар жүргізіліп, психологтар тартылған. Мектеп басшылығына сөгіс жарияланған.

Сондай-ақ, оқиғаға қатысқан жасөспірімдердің ата-аналары балаларды тәрбиелеу міндеттерін тиісінше орындамағаны үшін жауапкершілікке тартылған. Аталған дерек бойынша полиция қылмыстық іс қозғады.