Атаулы әлеуметтік көмек 274 мың қазақстандыққа тағайындалды

2025 жылғы 1 қазандағы жағдай бойынша атаулы әлеуметтік көмек (АӘК) 51 мың отбасындағы 274,4 мың адамға тағайындалды, деп хабарлайды Arbat.Media.

Төлемнің жалпы сомасы — 24,6 млрд теңге. Биыл бұл мақсатқа бюджеттен 98,4 млрд теңге қарастырылған.

АӘК-тің басты мақсаты — отбасыларды қиын жағдайдан шығару, яғни ақшалай қолдау көрсету және еңбекке қабілетті мүшелерін жұмыспен қамтуға тарту.

АӘК аясында:

1. табысы кедейлік шегінен төмен азаматтарға тоқсан сайын әлеуметтік көмек төленеді;
2. табысы аз отбасылардағы 1–6 жас аралығындағы әр балаға ай сайын 1,5 АЕК мөлшерінде қосымша төлем беріледі (қазіргі таңда 84,6 мың балаға 3,2 млрд теңге бөлінген);
3. отбасыларды жұмыспен қамту үшін гранттар, оқыту және жұмысқа орналастыру шаралары іске асырылады.