«Богатырь Көмір» компаниясының қызметкері көз жұмды

Павлодар облысында өндірісте жарақат алған «Богатырь Комир» ЖШС-нің қызметкері ауруханада қайтыс болды. Бұл ақпаратты компанияның баспасөз қызметі растады, деп хабарлайды Arbat.Media.

Оқиға 28 қаңтар күні «Молодёжная» станциясында болған.

Компанияның хабарлауынша, суару қондырғысына дизель отынымен құю кезінде жазатайым оқиға болып, қызметкер ауыр жарақат алған. Зардап шеккен адам Екібастұз қалалық ауруханасына жеткізілгенімен, алған жарақаттарының салдарынан қайтыс болған.

«Богатырь Көмір» ЖШС оқиғаға байланысты арнайы тергеу аясында уәкілетті органдармен бірлесіп жұмыс жүргізіп жатыр. Компания марқұмның жақындарына материалдық көмек көрсетілетінін мәлімдеді.