Енесін зорлады деген күдікке ілінген ер адамға қатысты тың дерек шықты
Алматыда енесіне жыныстық сипаттағы зорлық-зомбылық көрсетті деген күдікпен ер адам ұсталды, деп хабарлайды Arbat.Media.
Оқиға 17 тамызда болған. Алдын ала мәлімет бойынша, күдікті 1961 жылы туған енесінің үйіне «шай ішуге» барған. Жәбірленушінің дәрменсіз жағдайын пайдаланып, оған қатысты зорлық әрекетін жасаған деген күдікке ілінді.
Әйелдің үш баласы бар. Оның бір баласы ерекше күтімді қажет етеді. Жәбірленуші үш жыл бұрын ауыр жол апатына түсіп, содан бері денсаулығына байланысты қиындықтарға тап болған.
Оқиға жәбірленушінің қызы полицияға арызданғаннан кейін белгілі болған. Ол өз күйеуінің үстінен шағым түсіріп, анасының құқығын қорғауға тырысқан.
Бұған дейін іс бойынша сот-медициналық сараптама құжаттарының дұрыс рәсімделмеуіне байланысты тергеу процесі созылып кеткені айтылған. Осыдан кейін қоғам белсенділері істі бақылауға алып, қала прокуратурасы мен заңгерлерді араласуға шақырған.
Қазіргі уақытта оқиғаға қатысты тергеу амалдары жүргізіліп жатыр. Істің мән-жайы анықталуда.