«Кішкентайымнан жалтақ боп өстім»: Ақбота Керімбекова жан сырын ақтарды

Қазақстандық танымал әнші Ақбота Керімбекова бала кезінен өзін мазалаған жеке сезімдері туралы айтып, жан сырын ақтарды, деп хабарлайды Arbat.Media.

Өнер иесінің айтуынша, ол кішкентайынан көзіндегі қалына байланысты өзін жайсыз сезініп өскен. Әнші сол ерекшелігі үшін көпшілік арасында қысылып, кейде жалтақтап жүретінін жасырмады.

Ақбота Керімбекова бұл қалдың өз әулетінде бұрыннан бар екенін, нағашыларынан дарыған белгі екенін де атап өтті. Соған қарамастан, бала кезінде ол мұны өзгелерден ерекшеленіп тұрғандай қабылдап, көпшілікпен қатар жүруге ұялатын кездері болғанын айтты.

Әншінің сөзінше, уақыт өте келе ол өзінің сырт келбетіне басқаша көзқараспен қарай бастаған. Бүгінде өнер иесі бұл ерекшелікті табиғи қалпы ретінде қабылдап, бұрынғыдай қысылмайтынын жеткізді.

Айта кетейік, қазақстандық эстрадада өзіндік орны бар Ақбота Керімбекова тыңдармандарына тек әндерімен ғана емес, шынайылығымен де жақын. Әнші түрлі сұхбаттарында өміріндегі қиындықтар мен ішкі сезімдерін ашық айтып, көпшілікпен бөлісіп келеді.