«Отандастар» қоры мен «Россотрудничество» арасында ынтымақтастық туралы меморандумға қол қойылмақ

«Отандастар» қоры мен «Россотрудничество» арасында ынтымақтастық туралы меморандумға қол қоюға қатысты келіссөздер жүргізіліп жатыр. Бұл туралы Ақордада Ресей президенті Владимир Путинмен келіссөздердің қорытындысына орай өткен брифингте Мемлекет басшысы Қасым-Жомарт Тоқаев айтты, - деп хабарлайды Arbat.media.

«Біздің халықтарымызды біріктіретін маңызды фактор - орыс тілі. Қазақстан мектептеріндегі барлық білім алушылардың үштен бірі орыс тілінде білім алатынын атап өткім келеді. Қазақстанда біз бұл мәселеге үлкен мән береміз. Сондықтан мен орыс тілі бойынша халықаралық ұйым құруды ұсынған едім», - деді Президент.

Мемлекет басшысы келіссөздердің тағы бір өзекті тақырыбы Қазақстан және Ресей аумағында тұрып жатқан отандастарға қолдау көрсету болғанын айтты.

«Бұл ретте «Отандастар» қоры мен «Россотрудничество» арасындағы ынтымақтастық туралы меморандумға қол қою маңызды мәнге ие болар еді. Бұл тақырыпта келіссөздер жүргізіліп жатыр. Мұндай уағдаластықтар халықтарымыз арасындағы өзара түсінікстікті нығайтуда айрықша рөл ойнап, жалпы қоғамтастықтың оң көзқарасын табады», - деді Қасым-Жомарт Тоқаев.