Өзбекстан чемпионатында өнер көрсеткен боксшы Қазақстанға қоныс аударды

2023 жылғы Өзбекстан чемпионатында қола жүлде еншілеген қандасымыз Аман Қонысбеков Қазақстанға көшіп келді, - деп хабарлайды Arbat.media.

Бұл туралы әлеуметтік желіде qandas_sportshilar арнасы хабарлады.

Аман Қонысбеков Өзбекстанның Навоий облысы, Зафарабад ауылында дүниеге келген. Көрші ел чемпионатында 71 кг салмақ дәрежесінде өнер көрсетіп жүрді. Ол өткен жылы аталған салмақта Өзбекстан біріншілігінің жартылай сынында Асадходжа Муйдинходжаевты бірінші раундта нокдаунға түсіргенмен, финалға өте алмаған еді.

Боксшы Астанаға тұрақтаған. Алайда ол ел чемпионатында Түркістан облысының атынан сынға түсуі мүмкін.

Қазіргі уақытта Аман Қонысбеков еліміздің былғары қолғап шеберлерімен қатар Алматы қаласында оқу-жаттығу жиындарына қатысып жатыр.