Павлодарда дауыл тұрып, құлаған ағаш басып қалған тағы бір әйел көз жұмды

Павлодар облысында болған дауылдан кейін тағы бір әйел қаза тапты. Оны құлаған ағаш басып қалған, деп хабарлайды Arbat.Media.

19 маусым күні жеке үйдің ауласында 76 жастағы әйелдің үстіне ағаш құлап, оны басып қалған. Көптеген жарақаттармен науқас Екібастұз қалалық ауруханасының жансақтау бөліміне жеткізілген.

"Көрсетілген қарқынды емге қарамастан, алған жарақаттарының ауырлығы және жүрек-қан тамырлары аурулары мен қант диабеті сияқты созылмалы ауруларының болуына байланысты пациенттің жүрек қызметі тоқтады. Жансақтау бөлімінде бесінші күні оның биологиялық өлімі тіркелді", – деді Денсаулық сақтау басқармасы.

19 маусым кешке Павлодар облысында қатты дауыл соқты. Желдің екпіні секундына 43 метрге жеткен. Дауыл кезінде Ақсу қаласында құлаған ағаштың бұтағы такси салонында отырған әйелді шаншып өлтірген. Әкімдік марқұмның отбасына қаржылай көмек көрсетілетінін айтты.