Қазақстан халқының саны 20,6 млн адамнан асты

Ұлттық статистика бюросының мәліметінше, 1 тамыздағы жағдай бойынша елде 20 604 819 адам тұрады. Жыл басынан бері халық саны 104,9 мың адамға немесе 0,51%-ға өскен. Оның 99 419-ы табиғи өсімге, 5578-і көші-қонға тиесілі, деп хабарлайды Arbat.Media.

Халық саны ең жылдам өсіп жатқан қалалар – Астана, Алматы және Шымкент. Астана тұрғындарының саны 51 429 адамға артып, 1 690 605-ке жетті. Алматыда халық саны 31 690 адамға өсіп, 2 379 793 адам болды. Шымкентте бұл көрсеткіш 19 298 адамға артып, 1 313 348-ге жетті.

Ал 12 облыста халық саны азайған. Ең көп төмендеу Түркістан облысында тіркелді – 4212 адам. Одан кейін Жамбыл облысы – 3951, Абай облысы – 3817 адам. Қазір Қазақстанда 13,2 млн адам қалада, 7,4 млн адам ауылда тұрады. Жыл басынан бері қала тұрғындарының саны 126,6 мыңға өссе, ауыл халқы 21,7 мың адамға азайған.