Қонаев әкімдігі жосықсыз мердігер компанияны сотқа берді

Қонаев қаласының әкімдігі бірнеше нысанда құрылыс жұмыстарын уақытылы аяқтамаған мердігер ұйымды сотқа берді, - деп хабарлайды Arbat.media.

Әкімдік мәліметіне сәйкес, «SHEBERBUILD» ЖШС-ы шаһардағы жылу жүйелерін ауыстыру және Қ.Қайсенов атындағы №4 орта мектепті күрделі жөндеуден өткізу, №10 шағын ауданда 3 тұрғын үйді салу бойынша конкурсты ұтып алған. Оның ішінде оқу ошағының күрделі жөндеуі 2024 жылдың 30 сәуірінде аяқталуы керек болған. Алайда компания бұл уақытқа жұмыстарды аяқтап үлгермей, жұмыстың тек 75 пайызын ғана орындаған. Сондықтан қалалық білім бөлімі компанияның ісін сотқа жіберді, - деп жазады Kazinform агенттігі.

- Серіктестік №2,4,5 шағын аудандардың жылу желісін ауыстыруды осы жылдың қаңтарында межесіне жеткізуі керек еді. Бірақ былтырғы қыркүйек айынан компания жұмысы орындалу кестесінен кешіге бастаған. Осыған байланысты қалалық ТҮКШ бөлімі компанияға бірнеше рет хат жіберген. Нәтиже болмаған соң, істі Алматы облысы мамандандырылған ауданаралық экономикалық сотына жолдау жоспарланып отыр. Мұнда ТҮКШ бөлімі қос тараптың келісімшартын бұзу әрі мердігерді жосықсыз деп тану туралы талап қоюды көздеуде.

Ал №10 шағын аудандағы 180 пәтерлі тұрғын үйлер былтыр желтоқсанда қолданысқа берілуі керек болған. Құрылыс бөлімі бірнеше рет хат жолдап, кейін сотқа беріп, мерзімді 20 маусымға дейін созды. Қазіргі таңда 90 пайыз жұмыс аяқталды, - деп хабарлады Қонаев қаласы әкімдігінің баспасөз қызметінен.