Республикалық маңызы бар жолдарда ауыр жүк көліктеріне қойылатын уақытша шектеу әлі күшінде

Еліміз бойынша аптап ыстыққа байланысты асфальттың бүлінуіне жол бермес үшін республикалық маңызы бар жолдарда ауыр жүк көліктеріне уақытша шектеу әлі күшінде, деп хабарлайды Arbat.Media.

1 маусым мен 15 тамыз аралығында Абай, Ақмола, Ақтөбе,Қарағанды, Қостанай, Павлодар және Шығыс Қазақстан, Батыс Қазақстан, Солтүстік Қазақстан облыстарында шектеу күндізгі сағат 11:00-ден кешкі 21:00 аралығында жүреді.

Ал Алматы, Атырау, Жамбыл, Қызылорда, Маңғыстау, Түркістан, Жетісу және Ұлытау облыстарында 1 маусымнан 31 тамызға дейін сағат таңғы 10:00-ден түнгі 22:00 аралығында қолданылады.

Бұл талаптың халықаралық тасымалға, жолаушылар автобустарына, тез бұзылатын азық-түлік, қауіпті жүк, гуманитарлық көмек тасымалдайтын көліктерге, сондай-ақ әскери және төтенше жағдай қызметтерінің көліктеріне қатысты жоқ. «ҚазАвтоЖол» тасымалдаушыларға жолға шығар алдында ауа райын ескеріп, жүктің салмағы мен осьтерге түсетін күшті алдын ала тексеріп алуға кеңес береді.