Шерзат ісі бойынша сотталғандардың екеуі толық ақтауды сұрады: үкім өзгеріссіз қалды

Шерзат ісі бойынша сотталғандардың екеуі толық ақтауды сұрады. Алайда үкім өзгеріссіз қалды, деп хабарлайды Arbat.Media.

Бұған дейін жәбірленуші тараптың өкілі Мейірман Шекеев сотталған сегіз адамның екеуі – Азамат Тоқтаубаев пен Дидар Қалиахметов кассациялық шағым түсіргенін хабарлаған еді.

Екеуі де үкіммен келіспей, ақтауды сұраған.

Алайда Шекеевтің айтуынша, кассациялық сот сотталғандардың уәждерін негізсіз деп таныды. Бұған дейін шыққан үкімдер өзгеріссіз қалды.

Еске сала кетейік, 2025 жылы мамырда Азамат Тоқтаубаев 15 жылға, ал Дидар Қалиахметов 7 жылға сотталған.

Айта кетері, 2024 жылдың 4 қазанында Талғарда 16 жастағы Шерзат Полат кісі қолынан қаза тапты. Бұл іс бойынша 9 адам сотталды.