Шымкентте мұнай өнімдерін ұрлау схемасы әшкереленді
Шымкент қаласында жедел іс-шаралар барысында мұнай базаларынан жанар-жағармай ұрлау схемасы әшкереленді, деп хабарлайды Arbat.Media.
Бұл туралы Ішкі істер министрлігінің баспасөз қызметі хабарлады.
Ведомство мәліметінше, 7 қаңтарда Шымкент қаласының Полиция департаменті жедел ақпаратты іске асыру нәтижесінде жанар-жағармай материалдарын заңсыз шығару арнасын ұйымдастырған адамдар тобын ұстады.
Қылмыстық схемаға Шымкент мұнай өңдеу зауытымен байланысты кәсіпорындардың бірінің қызметкерлері тартылып, олар қала тұрғындарымен сөз байласқан. Ұрланған отынды сақтау және сату фактілері күдіктілерге тиесілі бірнеше базаның аумағында анықталған.
Аталған схема бойынша ақша айналымы 1 миллиард теңгеден асады. Тінту кезінде ірі көлемде қолма-қол ақша, 17 тоннадан астам жанар-жағармай, отынды сақтау және айдау жабдықтары, сондай-ақ бірнеше автоцистерна тәркіленді.
Қазіргі таңда барлық күдіктілер ұсталып, аса ірі көлемдегі ұрлық фактісі бойынша тергеу жүргізіліп жатыр.