Жетісу облысында құтқарушы қызмет барысында қаза тапты

Жетісу облысында құтқару операциясы кезінде өрт сөндіру бөлімінің қарауыл бастығы қаза тапты. Қайғылы оқиға Панфилов ауданында орналасқан Алтынкөл көлінде болған, деп хабарлайды Arbat.Media.

ТЖД мәліметінше, 7 наурызда Атамекен ауылдық округіндегі Алтынкөл көлінде балық аулап жүрген адам мұз жарылу салдарынан көлге ағып кеткені туралы хабар түскен. Оқиға орнына Жетісу облысы ТЖД күштері, Жаркент қаласындағы №11 өрт сөндіру бөлімінің қызметкерлері, Талдықорған қаласынан жедел-құтқару жасағы, сондай-ақ ҚР ТЖМ «Барыс» республикалық құтқару қызметі мен Алматы облысы ТЖД құтқарушылары жедел түрде жіберілген.

Алайда құтқару жұмыстары барысында мұз қайтадан жарылған.

«Құтқару жұмыстары кезінде мұз тағы да жарылып, соның салдарынан Панфилов ауданы төтенше жағдайлар бөлімінің №11 өрт сөндіру бөлімінің қарауыл бастығы, азаматтық қорғау майоры Дамир Таранов қаза тапты», деп хабарлады ТЖД.