Абай облысында тасқында жоғалған 3 адамды іздеуге тікұшақ шықты

Абай облысында тасқын су үш адамды ағызып кетті. Аягөз ауданында сүңгірулер суға кеткен малшы мен екі тракторшыны іздестіріп жатыр. Олар қызыл су лап қойғанда қашып үлгермей қалған. Сондай-ақ аталмыш аудандағы көпір де топан суға шыдас бермеді. Ал Жарма, Жаңасемей ауданында жұрттың қора-қопысысы суға көлкіп жатыр, - деп хабарлайды Arbat.media.

Аягөз ауданында тасқын үш адамды ағызып кетті. Арыны қатты қызыл су Аягөз - Бозай тасжолындағы көпірді қиратқан. Ал топан суды кешіп өтпек болған тактор төңкеріліп қалған. Ішіндегі жүргізушісі мен жолаушысы ұшты-күйлі жоқ. Сондай-ақ тағы бір малшы суға ағып кетті деген болжам бар. Сондықтан құтқарушылар лай судан үш адамды іздестіріп жатыр.

«Іздестіру жұмыстарына Абай облысының ТЖД, Полиция департаменті, жергілікті атқарушы органдар мен әскерилерден жалпы саны 82 адам, 4 жүзу құралы, 9 техника, 4 пилотсыз ұшу аппараты жұмылдырылды. Жергілікті тұрғындар да көмекке келіп жатыр. Су түбінің лай болуы және ағынның қаттылығы сүңгуірлерге кедергі келтіруде», - деп хабарлады Абай облысы әкімдігінің баспасөз қызметі.