Лувр мұражайын тонаған барлық күдікті ұсталды

Париждегі Лувр мұражайын тонаған тағы 4 адам ұсталды, деп хабарлайды Arbat.Media.

Полиция 4 адамды, екі ер адам (38 және 39 жас) және екі әйелді (40 және 31 жас) ұстады. Олардың барлығы Париж маңынан ұсталды. Енді мұражайды тонады деген күдікпен 8 адам қамауда отыр.

Прокурор Лор Бекон қарақшылардың кәсіпқой еместігін айтты. Алайда ұрланған зергерлік бұйымдар әлі табылмады. Естеріңізге сала кетейік, шығын 88 миллион еуроға бағаланған еді.

Қылмыс 19 қазан күні таңертең болған. Балаклавадағы төрт ұры Сена жағалауындағы ғимаратқа жақындап, Аполлон галереясының терезесіндегі жылжымалы баспалдақпен көтеріліп, ішке кірген. Полицияның айтуынша, олардың қолында қару-жарақ болмапты. Олар алты-жеті минут ішінде бағалы заттарды алып, кейін мотоциклмен қашып кеткен. 

Францияның мәдениет министрлігі мұражайдан Наполеон дәуіріндегі коллекциялардан сегіз зергерлік бұйым ұрланғанын растады. Олар:

• Мари-Амелия мен Гортензия патшайымдарға тиесілі жақұт орнатқан тәж (тиара), алқа және сырға;
• Мари-Луиза жиынтығынан зүбәржат әшекей және жұп сырғалар;
• Тұмар түйреуіш;
• Үлкен түйреуіш және Евгения патшайымның тәжі (диадема).

Евгения патшайымның тәжі ұрылар қашып бара жатқанда түсіп қалған. Кейінірек ол мұражайдың жанынан табылды. Drouot аукцион үйінің бағалауы бойынша, бұл тәждің құны ондаған миллион еуро тұрады.

Бір қызығы, қарақшылар Regent гауһарына қол тигізбеген. Ол Аполлон галереясында орналасқан Луврдың негізгі экспонаттарының бірі. Оның құны 60 миллион доллардан асады.

Тергеу мәдени құндылықтар саласындағы қылмыстармен айналысатын мамандандырылған полиция бөліміне тапсырылды. Париж прокуроры Лор Бекконың айтуынша, шамамен сатып алатын, болмаса арнайы ұрлауды тапсырған жеке коллекционерлерге қатысты тергеу нұсқасын әзірлеп жатыр.
Франция президенті Эммануэль Макрон ұрланған заттар табылып, кінәлілер жазаланады деп мәлімдеді.