Манчестер қаласында Қазақстанның Құрметті консулдығы ашылды
Қазақстан Республикасының Құрметті консулдығы ресми түрде Манчестерде ашылып, Қазақстан мен Ұлыбритания арасындағы аймақтық байланыстарды нығайту бағытында тағы бір маңызды қадам жасалды. Салтанатты іс-шарада жергілікті парламент мүшелері, саяси қайраткерлер және қазақстандық өкілдер қатысты, - деп хабарлайды Arbat.media.
Жаңадан құрылған консулдық екі ел арасындағы сауда, инвестиция, мәдениет және білім салаларындағы ынтымақтастықты дамыту бағытында жұмыс істейді, - деп жазады Kazinform агенттігі.
Қазақстанның Ұлыбританиядағы елшісі Мағжан Ілиясов бұл бастамалардың маңыздылығын атап өтіп, Манчестер қалалық кеңесінің депутаты Абид Латиф Чоханды Үлкен Манчестердегі Қазақстанның Құрметті консулы ретінде таныстырды. Чохан екіжақты қатынастарды ілгерілетіп, әсіресе экономикалық және мәдени байланыстарды нығайтуға өз үлесін қосады.
«Манчестерде Қазақстанның Құрметті консулдығының ашылғанына қуаныштымын. Бұл Қазақстан мен Ұлыбритания арасындағы аймақтық байланыстарға: сауда, инвестиция, мәдениет және білім беру салаларына баса назар аудара отырып, одан әрі дамытудағы маңызды қадам», - деп мәлімдеді Мағжан Ілиясов.
Елші, сонымен қатар «Болашақ» стипендиясының иегерлері – Манчестерде және басқа да қалаларда магистратура мен докторантура бағдарламалары бойынша оқып жатқан қазақстандық студенттермен кездесті. Әңгіме барысында студенттердің ортаға бейімделуі, академиялық жетістіктері және Қазақстанға оралғаннан кейінгі мансаптық мүмкіндіктері талқыланды.
«Болашақ» бағдарламасының стипендиаттарымен кездесу маған әрқашан қуаныш сыйлайды. Бұл жолы Манчестер мен одан тыс жерлерде оқып жатқан магистратура және докторантура студенттерімен бас қостық. Оларға тек сәттілік тілеймін», - деп жазды X әлеуметтік желісінде Мағжан Ілиясов.
