ШҚО: Кәсіпорынның 220 жұмысшысы жалақы алмай келген

Шығыс Қазақстан облысындағы кәсіпорындардың бірінде жалақыларын ала алмай келген 220 жұмысшының құқығы қорғалды. Риддер қаласының прокурорлары «Водоканал» кәсіпорнының 220 қызметкеріне жалақы төленбей келе жатқандығын анықтаған. Компанияның жұмысшыларға берешегі - 50 млн теңгеден асып кеткен. Марқакөл ауданының прокуратурасы «Теректі» коммуналдық кәсіпорнында 16 жұмысшы 2 ай бойы жалақы алмағанын, қарыз сомасы 5,4 млн теңгені құрағанын анықтады, - деп хабарлайды Arbat.media.

Прокурорлық қадағалау актілері бойынша екі кәсіпорында да жалақы бойынша берешек толықтай өтелді. Жұмысшылардың құқықтары қалпына келтіріліп, кінәлілер әкімшілік жауапкершілікке тартылды, - деп жазады Kazinform агенттігі.

ШҚО прокуратурасы жұмыс берушілерге ҚР Еңбек заңнамасын мүлтіксіз сақтау қажеттігін, оны бұзу заңда белгіленген жауапкершілікке әкеп соғатынын еске салды.