«$30 млн берсеңдер ...». Абылай Мырзахметов Қайрат Боранбаевтың туыстарынан пара талап еткен

30 миллион доллар берсеңдер, ағаларыңды түрмеден босатамын. «Атамекен» Ұлттық кәсіпкерлер палатасының бұрынғы басқарма төрағасы Абылай Мырзахметов Қайрат Боранбаевтың туыстарынан осынша пара талап сұрапты, - деп хабарлайды Arbat.media.  

Астанада былтыр мамырда Сыбайлас жемқорлыққа қарсы іс-қимыл агенттігі ұстаған Мырзахметовтің алдын ала сот тыңдауы өтті.

Ол алаяқтық және пара беруге итермелеу бабымен күдікке ілінген еді.

Сотта прокурор "Атамекеннің" бұрынғы басшысына қатысты біраз тың деректі айтты.

Тергеу мәліметінше, Қайрат Боранбаев істі болған соң Мырзахметов оның туыстарын жағалай бастапты.

«Бостандықты сатып алып беретін жоғарыда тамыр-таныстарым бар» деп, оның туған бауыры Талғат Боранбаевтан әуелі 15 миллион доллар алыпты.

Кейін 5 миллион сұратып, қалғанын іс біткен соң алуға уағдаласқан.