Түркістан қаласына ерекше мәртебе беріледі

Үкімет Түркістан қаласына ерекше мәртебе беруді жоспарлап отыр. Заң жобасы парламенттің қарауына жіберілді, - деп хабарлайды Arbat.media.

Қазақстан Республикасының Премьер-Министрі Олжас Бектенов «Түркістан қаласының ерекше мәртебесі туралы» заң жобасын Парламент Мәжілісінің қарауына енгізу туралы Үкімет қаулысына қол қойды.

Бұл қадам ел президенті Қасым-Жомарт Тоқаевтың Түркістан облысына жұмыс сапары барысында берген тапсырмаларын орындау аясында жасалды, деп жазады үкіметтің баспасөз қызметі.

Дайындалған заң Түркістанды Қазақстанның мәдени-тарихи орталығы ретінде дамытудың құқықтық шарттарын айқындап, оның мемлекеттік маңызын мойындайды.

Заңның қабылдануы қаланың тарихи-мәдени маңызы бар ескерткіштері мен объектілерін, оның ішінде Қожа Ахмет Яссауи кесенесін басқару мен сақтаудың тиімді жүйесін құруға мүмкіндік береді.

Заң жобасының маңызды аспектісі – мәдени мұраны сақтау, қолөнерді дамыту және Түркістанды туристік орталық ретінде насихаттау.

Әрбір тарихи-мәдени мұра объектісі үшін қорғау аймағы белгіленіп, аумақтың жоспарлары мен карталары әзірленді.

Қаладағы тарихи орындардың болуына қауіп төндіретін кез келген әрекетке тыйым салынады.

Археологиялық олжаларды сақтау мақсатында қорық құру және оларды болашақ ұрпаққа сақтау және қолдау шараларын қабылдау жоспарлануда.