Эльбрус тауында 6 альпинист көз жұмды

ТАСС агенттігінің хабарлауынша, Эльбрус тауында бір тәулік ішінде 6 альпинист қаза тапқан. Олардың бесеуі - 7 адамнан тұратын топ құрамында тауға көтерілген Босния және Герцеговина азаматтары болса, біреуі басқа топтың құрамында болған ресейлік альпинист, деп хабарлайды Arbat.Media.

Алдын ала мәлімет бойынша ауа райының күрт нашарлауынан альпинистер бағыттан адасып, бірнешеуі гипотермия - дененің қатты тоңуынан көз жұмған. Қазір қатты боран мен екпінді жел құтқару жұмыстарына кедергі келтіріп жатыр.

Оқиғаға байланысты екі немесе одан да көп адамның абайсызда қаза болуына әкеп соққан әрекет бойынша қылмыстық іс қозғалды. Тергеу жалғасып жатыр.