300 қатысушы және 17 мамандық: «Үздік маман» байқауы
Маңғыстау облысында «ҚазМұнайГаз» компаниялар тобының жұмысшы мамандықтары арасында өткізілген жыл сайынғы «Үздік маман — 2024» байқауы өз мәресіне жетті. Мұнай-газ кешені саласындағы 17 мамандық бойынша 300 қатысушы өз шеберліктерін сынады. Биыл байқауға алғаш рет Румыниядан келген KMG International қызметкерлері қатысты. Ақтық кезең жарысының қатысушылары — бұл өз ұжымдары арасында іріктеуден өткен жеңімпаздар, - деп хабарлайды Arbat.media.
Іс-шараның жабылу салтанатында ҚМГ басшысы Асхат Хасенов жиналғандарды құттықтап, барлық қатысушылар жақсы нәтиже мен жоғары кәсіби шеберлік көрсеткендерін атап өтті, - деп жазады Kazinform агенттігі.
— «ҚазМұнайГаз» және оған қарасты барлық кәсіпорындар — ел экономикасының дамуына үлкен үлес қосып отырған компаниялар. Өңірлерде азаматтардың әл-ауқатын көтеруге бағытталған ауқымды әлеуметтік жобалар белсенді іске асырылуда. Бұған сіздердің әрқайсыңыздың қосып жатқан үлестеріңіз зор. «Үздік маман — 2024» байқауы біздің мамандардың білім деңгейі мен кәсібилігінің жоғары екендігін тағы да дәлелдей түсті», — деп атап өтті А.Хасенов.
Байқау екі кезеңнен тұрды: теориялық білімді тексеруге арналған тестілеу және практикалық тапсырмаларды орындау. Жарыстар ҚМГ-ның еншілес компанияларының өндіріс алаңдарында өтті — «Өзенмұнайгаз» АҚ, «Маңғыстаумұнайгаз» АҚ (Жетібай), «ҚазТрансОйл» АҚ (Маңғыстаумұнай құбыры басқармасының оқу орталығы), «ҚМГ Инжиниринг» ЖШС (Ақтау қаласындағыхимиялық талдау зертханасы).
«Үздік маман — 2024» байқауының қатысушылары бұл дода жыл сайын ҚМГ еншілес компанияларының еңбек ұжымдарын біріктіріп, мұнай-газ саласындағы мамандықтар бойынша шеберлікті шыңдауға көмектесетінін атап өтті.