Әкесін аяусыз соққыға жыққан Түркістан тұрғыны 5 жылға сотталды

Түркістан облысының 41 жастағы тұрғыны Алмас Садақбаев өз әкесін соққыға жығып, азаптағаны үшін кінәлі деп танылып, 5 жылға бас бостандығынан айыру жазасына кесілді, деп хабарлайды Arbat.Media.

Еске салайық, өткен жылдың қыркүйегінде әлеуметтік желілерде көршісі жасырын түрде түсірген видео тараған еді. Бейнежазбада ер адамның үй ауласында қарт әкесін аяусыз соққыға жыққаны көрінеді. Қарттың беті қанға боялған, ал орнынан тұра алмай қалған сәтте ұлы әйелін шақырып, екеуі оны үйге кіргізген. Кейін зейнеткер көз жұмды.

Полиция істі ерлі-зайыптыға қатысты тергеген. Алайда әйеліне қатысты «Ұрып-соғу» бабы бойынша іс дәлелдің жеткіліксіздігіне байланысты тоқтатылған. Марқұм тірі кезінде дәрігерлердің бақылауында болып, гипертензиялық жүрек ауруы және омыртқа остеохондрозы диагнозымен есепте тұрғаны белгілі.

Үкім шығарылар алдында Садақбаев соңғы сөз сөйлеп, жылап, жасаған ісіне өкінетінін айтты. Ол бауырларынан және «Қазақстан халқынан» кешірім сұрады. Сондай-ақ кәмелетке толмаған балалары бар екенін, ал қазіргі жұбайы балалардың кішкентай болуына байланысты жұмыс істемейтінін айтып, осы жайттарды ескеруді өтінді.