Алакөлде 17 жастағы жасөспірім адамдардың көз алдында суға батып кетті

Абай облысына қарасты Жарбұлақ ауылы жағындағы Алакөлде 17 жастағы жасөспірім суға батып мерт болды, деп хабарлайды Arbat.Media.

Әлеуметтік желідегі ақпараттарға сүйенсек, паром маңында шомылып жүрген жігіт құтқару желетін кимей суға түскен. Біраз уақыттан кейін ол суға бата бастаған. Жігітті байқаған басқа бір демалушы оған жүзіп барған. Алайда үрейге бой алдырған жігіт құтқарушыны да суға тартқан.

Нәтижесінде жігіт су астынан шыға алмай, көптің көз алдында көз жұмды.

Осы факті бойынша Абай облысының полициясы 32 жастағы қайық иесіне қатысты сотқа дейінгі тергеуді бастады. Ол қауіпсіздік талаптарына сәйкес келмейтін қызметтер көрсетті деген күдікке ілінді.