Алаяқтар екі ай бойы зейнеткерге қысым көрсетіп келген

Ақтөбеде 70 жастағы зейнеткер екі ай бойы алаяқтардың психологиялық арбауында болды. Осы уақыт ішінде ол оларға сатқан пәтерінен түскен ақшаны қоса алғанда, 18 миллион теңгеден аса қаражат аударған, деп хабарлайды Arbat.Media.

Бұл туралы Ақтөбе облысы полиция департаментінің баспасөз қызметі мәлімдеді.

Алаяқтар өзін eGov және Ұлттық қауіпсіздік қызметінің қызметкері ретінде таныстырған. "Шотыңа шабуыл болды" деген сылтаумен олар әйелді қаражатты "қауіпсіз" деп саналатын есепшотқа аударуға сендірген. Пәтерін сатқанын білгенде, олар әйелді сол ақшаны да жіберуге алдаған.

Киберполиция тексеру барысында пәтерді сатудан түскен қаражаттың Шымкентке такси арқылы жіберілгенін анықтады. Жедел топ дереу іс-сапарға шығып, нәтижесінде оған 9 миллион теңгеден аса қаражат қайтарылды.

"Мұғалім болып жұмыс істедім, алаяқтарға қалай сенгенімді түсінбеймін… Екі күннен кейін менің туған күнім, бұл - өмірімдегі ең жақсы сыйлық. Көп рақмет сіздерге!" - деп алғысын білдірді.