Алматы әуежайында канадалық азамат шу шығарды

Алматы халықаралық әуежайында шетел азаматының қатысуымен жанжал шықты. Оқиға «Алматы – Франкфурт» бағытындағы рейске тіркелу кезінде болған, деп хабарлайды Arbat.Media.

Көлік полициясының мәліметінше, ер адам әуежайдағы анықтама бөлімінде өзін дөрекі ұстап, айналасындағыларға балағат сөздер айтқан. Кейін ашуға булыққан жолаушы шыны витринаны жұдырықпен ұрып, әйнек сынықтары қызметкерлер тұрған жерге құлаған.

Оқиға салдарынан ешкім жарақат алған жоқ.

Тәртіп бұзған адамның Қазақстанда тұратын 32 жастағы Канада азаматы екені белгілі болды. Ол Түркістан облысындағы Арыс қаласында орналасқан компаниялардың бірінде жұмыс істейді.

Полиция оған әкімшілік хаттама толтырып, шамамен 130 мың теңге көлемінде айыппұл салды.