Ақтауда алимент борышкері 45 млн теңгесін букмекерге жұмсаған

Прокурорлар алимент төлемей жүрген 13 борышкердің 73,3 млн теңге кірісті жасырғанын анықтады. Алимент бойынша борышкер А. 2023-2024 жылдары букмекерлік кеңседегі жеке шотына бәс тігу үшін 45,7 млн теңге салған, - деп хабарлайды Arbat.media.

Атқарушылық құжат бойынша 2,5 млн теңге берешегі болса да, ол сырт көзге өз міндетін орындап жатқанын көрсету мақсатында 85 мың теңге жалақыға жұмысқа формальды ғана орналасқан, - деп жазады Kazinform агенттігі.

Аталған факт бойынша прокуратура ҚР ҚК-нің 139-бабымен тергеу бастады.

Жыл басынан бері прокурорлардың бастамасымен 21 борышкерге қатысты тергеу басталған, 13 іс бойынша сот үкімі шықты, қалғандары тергелуде.

Прокуратура алимент төлемеудің құқықтық салдары бар екенін қатаң ескертеді.