Аудан әкімінің ұлы 7 сыныпта оқитын қызды ұрып, мұрнын сындырған
Павлодарда аудан әкімінің ұлы 7 сыныпта оқитын қызды ұрып, мұрнын сындырған. Бұл туралы зардап шеккен қыздың анасы Instagram-дағы парақшасында жариялады. Ол прокуратура мен облыс әкімінен бұл іске араласып, кінәлі тарапты қылмыстық жауапкершілікке тартуды сұрап отыр, - деп хабарлайды Arbat.media.
Оқиға 10 қаңтар күні болған. Павлодар қаласындағы №8 лицейдің 6 сыныбында оқитын ер бала 7 сыныптағы қызды соққының астына алып, мұрнын сындырған.
Өзін Татьяна деп таныстырған қыздың анасы бұл жағдайға прокуратура мен өзге органдар құқықтық тұрғыдан дұрыс баға беруді, ұлдың ата-анасына қатысты қабылданған әкімшілік құқық бұзушылық туралы қаулының күшін жоюды сұрап отыр.
«Менің 7 сыныпта оқитын қызыма 6 сыныпта оқитын ер бала дене жарақатын салып, мұрнын сындырған. Сондай-ақ ол қызыма жеті рет ауыр соққы жасаған. 16 наурыз күні баламның мұрын сүйектері екінші мәрте түзетілді. Прокуратура органдарынан әкімшілік құқық бұзушылық туралы қаулының күшін жойып, ер баланың ата-анасын ҚР Қылмыстық кодексінің 140-бабы бойынша жауапқа тартуды сұраймын. Мәселеге облыс әкімі Асайын Байхановтың да назар аударуын өтінемін», - деді зардап шеккен оқушының анасы Instagram-дағы бейнежазбасында.