Еліміздің тағы бірқатар облысында казинолар ашылады

Еліміздің тағы бірқатар облысында казинолар ашылады. Мәжіліс жаңа заңды екінші оқылымда қабылдады, деп хабарлайды Arbat.Media.

Қазір казинолар Бурабай мен Қапшағайда орналасқан. Ал жаңа заңға сәйкес, алдағы уақытта Маңғыстау облысында — Каспий теңізінің жағалауында, Панфилов ауданында — Алакөл маңында, сондай-ақ Жетісу, Алматы және Шығыс Қазақстан облыстарында ашылмақ.

Туризм және спорт министрі Ербол Мырзабосыновтың айтуынша, мемлекет тек қай өңірлерде ойын аймағы болатынын анықтайды. Ал казино нақты қай жерге салынатынын жергілікті әкімдіктер шешеді. Бұл туризмді дамыту үшін жасалып отыр. Бір казино жылына 2–3 миллиард теңге салық төлеп, шамамен 500 адамды жұмыспен қамтиды деп күтілуде.

Бұл тақырып лудоманиямен, яғни құмар ойынға тәуелділікпен күрес туралы жаңа заң аясында қаралып жатыр. Министрдің айтуынша, жергілікті тұрғындар бұл бастамаға қарсы емес. Ал казиноға келетін негізгі адамдар — шетелдік туристер болады.