Гүлмира Сатыбалдының ісі: сотта жәбірленушінің тағы бір ағасы сөз сөйледі
Алматының қылмыстық істер жөніндегі мамандандырылған ауданаралық сотында Гүлмира Сатыбалдыға қатысты сот отырысы жалғасып жатыр. Кезекті сот отырысында кәсіпкер, жәбірленуші Абай Жүнісовтің бауыры Қасым Жүнісов сөз сөйледі, - деп хабарлайды Arbat.media.
Бұл туралы Kazinform агенттігі жазады.
Қасым Жүнісовтың сөзінше, 2019 жылдың 13 ақпанында Baur Kazakhstan компаниясының кеңсе менеджері Индира Әбдіраманова телефон соғып, Гүлмира Сатыбалдының кеңсеге шұғыл келуін сұрап жатқанын жеткізген.
«Мен тез жиналып кеңсеге келдім. Гүлмира Сатыбалданың кабинетіне кірген кезде, онда бірнеше адам болды. Атап айтар болсам, бауырым Абай Жүнісов, Айбатыр Жұмағұлов, Айгүл Мекешова, Бақыт Қабенов, Ғани Бекбосынов («Ария-Жаңа Астананың» бас директоры) үстел басында отырды. Ал, Гүлмира Сатыбалды тұрып тұрды. Абайдың жанынан орын алуымды бұйырды. Осыдан кейін Гүлмира өмірімде естімеген сөздерді айтып, бауырың 5 миллиард теңге ұрлады деп айқалады. Мен шошып кеттім. Абайдың еңсесі түсіп, көңілсіз отырды. Ол Абайдың компаниядан осыншама соманы ұрлағанын маған және тағы екі қатысушының растауын талап етті. Бірақ мен мұның бәріне шыдамай, оған қол қоя алмайтынымды, Абайдың онымен ұзақ уақыт жұмыс істеп жүргенін және бұл ақшаны ұрламағанын айттым. Содан кейін ол Мекешоваға растайтын құжаттарды ұсынуды тапсырды. Ол оған екі сағат уақыт беретінін жеткізді. Мекешова бір апта қажет екенін айтты. Сонда Гүлмира қатты ашуланып, бандиттерге Абайды соққыға жығуға бұйрық беретінін айтып, қорқытты», - деп еске алады Қасым Жүнісов.
Ол біраз уақыттан кейін ағаларымен бірге босатылып, Абай Жүнісовті Мәди Батыршаев пен басқа да адамдар ертіп, өз үйіне алып кеткенін атап өтті.
«Келесі күні, яғни ақпанның 15-де таңертең ағам мен анам үшеуміз Абайдың үйіне бардық, бізді кіргізбеді. Мәди Батыршаевтың рұқсатымен кіруге болатынын білдік. Содан соң мен Гүлмирамен кездесу үшін кеңсеге бардым. Сол жерде ол маған: «Егер ағаңды босатып алғың келсе, бүкіл дүние-мүлкіңді сатып, туыстарыңа хабарла», - деді ол.
Одан әрі жәбірленушінің айтуынша, компанияның адвокаты Дінмұхамед Жұмаділда онымен хабарласып, үш үйдің құжаттарын беруді талап еткен.
«Келесі күні түскі уақытта үйіме бір жігіт келіп, өзін Валентин Казимиров деп таныстырып, менің үйімді бағалағысы келетінін айтты. Ол барлық бөлмелерді қарап шықты, үйді және бүкіл аумақты суретке түсірді, содан кейін ештеңе айтпастан кетіп қалды. Оның егжей-тегжейлерін сұрап үлгермедім. Түстен кейін бір әйел келіп, барлық бөлмелерді түсіре бастады. Оның да бағалаушы екенін түсіндім. Ол да ештеңе айтпастан кетіп қалды», - деп қосты ол.
Оның сөзінше, 2019 жылғы 18 ақпанда Гүлмира Сатыбалды Қасымға өзі телефон соққан, кейін Land Cruiser 200 көлігін сатып, қолына 22 млн теңге алғаны туралы қолхат жазған.
«19 ақпанда ол маған телефон соғып, үйімнің 180 мың долларға бағаланғанын айтты. Ол уақытта доллар бағамы 376,6 теңге еді. Теңгеге аударғанда 68 млн теңге болатын. Бірнеше күннен кейін мені Жароков көшесіндегі нотариалдық кеңсеге шақырды, әйелім екеуміз сонда бардық, Жұмаділда мен Қабенов бізді сол жерден қарсы алды. Біз сатып алу шартына қол қойдық. Сол жерге менің құдамның досы ақша әкелді, менің көзімше ақшаны соларға берді. Содан Қабеновтан бұл ақшаның кімдікі екенін сұрадым, ол Г.Сатыбалдыға беремін деп жауап берді», - деп нақтылады ол.
Қасым Жүнісовтің айтуынша, барлық дүние-мүлкін аударғаннан кейін, олар Гүлмира Сатыбалдыға телефон соғып, Абай Жүнісовке баруға рұқсат алған. Қасым Абайды көруге анасы мен інісі Алтайды ертіп барған.
«7 наурызда ағам мен анам Кенесары хан көшесіндегі Абайдың үйіне бардық. Онда бейтаныс адамдар болды. Үйге кірдік. Абай қараңғыда жатын бөлмесінде жатты. Ұзақ сөйлесуге мүмкіндік болмады. Анам жылап жіберді. Өледі деп қорықты, өйткені тамақ та болмады. Анам Қайрат Сатыбалдының анасымен кездескісі келетінін айтты. Басында бұл идеяға қарсы болғанбыз, кейін келістік. Мен оны Сатыбалдының анасының кеңсесіне апарып, көлікте күттім. Содан бір сағаттан кейін анам шығып, оның суық қанды екенін, ештеңе уәде етпегенін және 7-10 күн ішінде жауап беретінін жеткізді. Алайда, жауап болмады. Бірнеше күннен кейін Алтай ағам Қайрат Сатыбалдының барлық компанияларға аудит жүргізгісі келетінін айтты», - деп қосты Қасым Жүнісов.
Жүнісовтың сөзінше, оларды шындық детекторымен тергеу жүргізген.