Ирандағы соғыс салдарынан Жапонияда пластик пакет тапшылығы байқалды
Жапониядағы ірі сауда желілері, фастфуд мейрамханалары, супермаркеттер мен наубайханалар бір реттік пластик пакеттер, тағам қаптамалары және тағамға арналған қорғаныш қолғаптардың жетіспеушілігіне тап болған, деп хабарлайды Arbat.Media.
Мамандардың айтуынша, бұл жағдайдың негізгі себебі – нафта (тікелей өңделетін бензин) тапшылығы. Нафта – пластик өндірісінде қолданылатын маңызды химиялық компонент.
Қалыптасқан дағдарыс Таяу Шығыстағы ұзаққа созылған әскери қақтығыстармен және Ирандағы соғыс жағдайымен байланыстырылады. Бұл оқиғалар мұнай жеткізу логистикалық жолдарын қиындатып, өңірлік нарықтарға кері әсер еткен.
Жапон мұнай-химия өнеркәсібі қауымдастығының (JPCA) деректеріне сәйкес, наурыз айында полиэтилен өндірісі өткен жылдың осы кезеңімен салыстырғанда 62%-ға төмендеген.
Жапония бұл қиындықты сезінген жалғыз ел емес. Оңтүстік Кореяның Сеул қаласында да тұрғындар арасында дүрбелең туып, кәдімгі қоқыс пакеттерінің күнделікті сатылымы наурыз айында бес есеге жуық артқан.