Мамандар шілде айының ауа райын болжады

Мамандардың айтуынша, бұл ай елімізде жыл ішіндегі ең ыстық кезеңдердің бірі болып, кей өңірлерде экстремалды температура тіркелуі мүмкін, деп хабарлайды Arbat.Media.

Синоптиктердің мәліметінше, Қазақстанның солтүстігі мен шығысында орташа температура +18…+23 градус аралығында болады. Ал оңтүстік өңірлерде ауа температурасы +28…+30 градусқа дейін көтеріледі.

Алайда кей күндері аптап ыстық күшейеді.

Солтүстік пен шығыста ауа +42…+43 градусқа дейін жетуі мүмкін. Орталық, батыс және оңтүстік-шығыста +47…+48 градусқа дейін көтеріледі. Оңтүстікте температура тіпті +50 градусқа дейін жетуі ықтимал.

Сонымен қатар, солтүстік пен шығыс өңірлерде шілде айы ең жаңбырлы кезеңдердің бірі болады. Кей жерлерде бір тәулік ішінде айлық мөлшердегі жауын-шашын түсуі мүмкін. Найзағай, бұршақ және қатты жел жиі байқалуы ықтимал.

Синоптиктердің айтуынша, таулы аймақтарда бұршақ жауу қаупі де жоғары.