Маңғыстауда 126 қой белгісіз себептен қырылып қалды

Маңғыстау облысының Бейнеу ауылында 28 қыркүйек күні 126 бас ұсақ мал қырылған, деп хабарлайды Arbat.Media.

Әлеуметтік желіде қойлардың «Бейнеу Су Сервис» кәсіпорны маңында жиналған судан су ішкеннен кейін өлгені туралы ақпарат тараған.

Бейнеу ветеринария станциясының мамандары оқиға орнына барып, ауыл тұрғынының қорасындағы 126 өлген қойды анықтаған.

Қазір жиналған су мен өлген малдан сынама алынып, зертханаға жіберілді. Өлген қойлар ветеринариялық талаптарға сай арнайы биошұңқырда өртеліп, қораға дезинфекция жүргізілген.

Аудандық ішкі саясат бөлімінің басшысы Тұралы Жолышовтың айтуынша, тірі қалған қойлардан жұқпалы ауру белгілері анықталмаған. Оқиға аудан әкімдігінің бақылауында.