Петропавлда өзенге жасырынған ер адам үсіп қаза тапты
Петропавлда 21 жастағы ер адам мұздай суда жасырынып қаза болды, деп хабарлайды Arbat.media.
Алдын ала мәлімет бойынша, 2 сәуір таңертең әлеуметтік желілерде Солнечный шағынауданында ер адам қатты тоңғаннан көз жұмғаны туралы ақпарат пайда болды. Ол ұрлық жасады деген күдікпен іздестіру кезінде өзендегі мұздай суға түсіп, біраз уақыт бойы полициядан жасырынғаны айтылды.
Солтүстік Қазақстан облыстық Полиция департаментінің баспасөз қызметі ер адамның қаза болғанын растады, бірақ оқиғаның толық мән-жайын ашып айтпады.
"2 сәуірге қараған түні жедел жәрдем көлігінде Петропавлдың 21 жастағы тұрғыны қайтыс болды. Ол Солнечный ауылының бұрылысына жақын маңда табылған. Денесінде зорлық-зомбылық белгілері анықталмады. Қазіргі уақытта оқиғаның барлық мән-жайы мен себептерін анықтау үшін тергеу жүргізіліп жатыр", – деп хабарлады облыстық Полиция департаментінің баспасөз қызметі.