Қазақ, қырғыз, қарақалпақ киіз үй дәстүрі ЮНЕСКО-ның мәдени мұралар тізіміне кірді

Бұл шешім 10 желтоқсанда Нью-Делиде өткен Материалдық емес мәдени мұраны қорғау жөніндегі Үкіметаралық комитеттің 20-сессиясында бірауыздан қолдау тапты, деп хабарлайды Arbat.Media.

Қуанышты жаңалықты ең алғаш жеткізгендердің бірі — Өзбекстан президенті әкімшілігінің басшысы Саида Мирзиёева. Ол бұл туралы өз Telegram-арнасында жазды.

«Бұл дәстүрімізді, рухани мұраның күші мен ұрпақтар сабақтастығын халықаралық деңгейде мойындау», - деді ол.

Қазақ, қырғыз және өзбек (Қарақалпақстан) халықтарының киіз үй дайындауға қатысты дәстүрлі білімі мен қолөнер шеберлігі ЮНЕСКО-ның адамзаттың материалдық емес мәдени мұрасының репрезентативті тізіміне енгізілді.

ЮНЕСКО-ға ұсынылған құжатта киіз үйдің тек баспана ғана емес, қазақ, қырғыз және қарақалпақ халықтарының ұлттық келбетін айқындайтын маңызды мәдени рәміз екені көрсетілген.

Еске салайық, ЮНЕСКО дерегіне сәйкес, қазіргі уақытта материалдық емес мәдени мұра тізімдерінде 153 елден 812 элемент бар.