Қостанай облысында жасөспірімдер WhatsApp аккаунттарын алаяқтарға сатқан

Қостанай облысында жасөспірімдер WhatsApp аккаунттарын алаяқтарға сатқан, деп хабарлайды Arbat.Media.

Қостанай облысында киберқылмысқа қарсы іс-қимыл басқармасы қызметкерлері Жітіқара қаласында WhatsApp аккаунттарын телефон арқылы алаяқтық жасайтын адамдарға сатқан үш жасөспірімді анықтады.

Жасөспірімдердің аккаунттарын пайдаланған алаяқтар Қостанай қаласының екі тұрғынын жалпы сомасы 11 миллион 950 мың теңгеге алдаған. Қаскөйлер жәбірленушілерге қоңырау шалып, түрлі сылтаулармен SMS арқылы келген кодты айтуын сұраған. Кодқа қол жеткізген соң, олар жәбірленушілердің банк шоттарынан қаражатты шешіп алған.

Қазіргі уақытта тергеу амалдары жүргізілуде. Оның қорытындысы бойынша жасөспірімдердің іс-әрекетіне құқықтық баға беріліп, олардың ата-аналарын жауапкершілікке тарту мәселесі қарастырылмақ.