Сиднейдегі казинода қазақстандық ерлі-зайыпты астыртын әрекеті үшін ұсталды
Қазақстандық ерлі-зайыпты Сиднейдегі казинода 1,18 миллион доллар көлемінде алаяқтық жасады деген күдікпен ұсталды, деп хабарлайды Arbat.Media.
Полиция мәліметінше, 36 жастағы қазақстандық әйел казино қызметкерлерінің көзіне бірден түскен. Олар оның киіміндегі Микки Маус бейнесі түрінде жасырын мини-камераны байқап қалған. Күзетшіге хабар берілгеннен кейін оқиға орнына полиция шақырылып, әйел мен оның 44 жастағы күйеуі ұсталған.
Тінту барысында олардан магниттік зондтар, батареялар және жасырын түсіруге арналған арнайы телефон құрылғылары табылған. Сондай-ақ ұялы телефонға жалғанатын шағын айналы адаптер тәркіленді.Сиднейдегі жалдамалы пәтерлерінен қосымша ойын құрылғылары, әшекей-бұйымдар және 2 мың еуро табылған.
Полиция болжамына сәйкес, жұп Аустралияға 2025 жылдың қазанында келіп, сол күні-ақ казиноға мүшелік рәсімдеген. Қазан мен қарашада олар бірнеше рет үлкен сомада ақша ұтып, күдік тудырған.
Тергеу нұсқасы бойынша, мобильді телефондар ойын үстеліндегі карталарды жасырын түсіріп, ақпаратты құпия құлаққап арқылы жеткізіп отырған. Осылайша олар тиімді сәттерде бәс тігіп, жүйені алдап отырған.