Желіде Сұлтан Сәрсемалиев туралы ақпарат таратқан хакердің соты болады

Атыраудағы Сұлтан Сәрсемалиевке қатысты істің мән-жайын әлеуметтік желіде жариялаған азаматқа алаяқтық бойынша 12 эпизодқа қатысты айып тағылған. Бұл туралы Ішкі істер министрінің орынбасары Санжар Әділов мәлімдеді, деп хабарлайды Arbat.Media.

Вице-министрдің айтуынша, күдікті Түркиядан Қазақстанға экстрадицияланған. Қазір қылмыстық іс бойынша тергеу аяқталып, материалдар сотқа жолданған.

«Ол қандай да бір деректер базасын аша алмайды. Ол алған және жариялаған ақпараттың барлығын біздің қызметкерлерден алған», – деді Санжар Әділов.

Оның сөзінше, ақпаратты күдіктіге берген ІІМ қызметкерлері де жауапкершілікке тартылып, тиісті жазасын алған.

Қазір іс сотта қаралып жатқандықтан, министрлік тергеуге қатысты өзге мәліметтерді жарияламады.