Жамбыл облысының Жаңатас қаласында көшелерді су басты

Жамбыл облысының Жаңатас қаласында көлбеу ағын пайда болып, көшелерді су басып, үйлерге де кіріп жатыр. Жамбыл облысында мол мөлшерде түскен жауын-шашын салдарынан Сарысу ауданында көлбеу ағын пайда болды. Қазір онда үйлерді су басу қаупі туындап тұр, - деп хабарлайды Arbat.media.

Жамбыл облыстық Төтенше жағдайлар департаментінің хабарлауынша, 7 шілде күні сағат 17:00-де Сарысу ауданы Жаңатас қаласында жаңбырдың салдарынан Байсейітов, Есеев, Аяпов, Құрманғазы мен Клочков көшелерін су басты. 200-ден астам тұрғын үйдің ауласына су кіріп, 21 үй су астында қалды, - деп жазады Kazinform агенттігі.

«Сағат 19:00-дегі жағдай бойынша, су деңгейі төмендеді. Атқарушы органдар су басқан үйлерді аралап, тексеріп жүр. Жағдай бақылауда. Зардап шеккендер мен мерт болғандар жоқ»,-деді ведомство өкілі.

Облыстық әкімдіктің мәліметтері бойынша, күннің бұзылып, желдің күшеюіне байланысты бірнеше ауылдық округте тоқ сөніп қалған. Коммуналдық қызметтер шақыртуларға жедел шығып жатыр.

Қазіргі таңда Байқадам ауылдық округінің Саудакент ауылында электр қуаты қалпына келтіріліп жатыр.

Жаңатас қаласына ТЖД-ның 43 құтқарушысы келді, 20-дан астам техника жұмылдырылды. Оқиға орнында облыстық ТЖД бастығының орынбасары Руслан Орынбеков, өрт сөндіру және апаттан құтқару жұмыстары қызметі бастығының орынбасары Жеңіс Бақбергенов, сондай-ақ полиция мен аудандық әкімдік өкілдері жүр. Азаматтық қорғаныс қызметкерлерінен жедел штаб құрылды. ТЖД-да жедел штаб жұмыс істеп жатыр.