Журналист
«Майқайыңалтын» АҚ-да төрт құтқарушының өмірін жалмаған апаттан кейін жұмысы тоқтап тұрған кеніш қайтадан ашылды. Бүгінде онда жерасты жарылыстары ұйымдастырылып, алтын комбинатына шикізат толассыз жеткізіліп жатыр.
Палестиналық ХАМАС қозғалысының шетелдік өкілдігінің басшысы Халид Машаль енді ұйымға басшылық етеді. Бұл Израиль армиясы ХАМАС саяси бюросының басшысы Яхья Синварды өлтіргеннен кейін болған оқиға.
Павлодар облысының диқандары астықты дәнді дақылдар бойынша биыл тағы рекордтық өнімге қол жеткізді. Өңірде 1 млн 116 мың тонна астық қамбаларға құйылып жатыр. Павлодар облысының егіс далаларында қазіргі уақытта майлы дақылдан өзге дақылдардың барлығы жиналды. Фермерлер үшін жиын-терім науқаны табысты өтіп, рекордтық өнімдер алынды.
2050 жылдарға қарай еліміздің солтүстік өңірі халқының саны 30 пайызға дейін азаюы мүмкін. Мұндай пікірді аталған өңірдің демографиялық ахуалына 3 жыл бойы зерттеу жүргізген С.Сейфуллин атындағы Қазақ агротехникалық университетінің қауымдастырылған профессоры Қайрат Бодаухан айтты.
Қырғызстанда мүгедек және материалдық көмекке мұқтаж ата-анасын асыраудан бас тартқан, сондай-ақ балаларына алимент төлемегендер үшін жаза қатайтылып жатыр. Жогорку Кенеш депутаттары кейбір заңнамалық актілерге тиісті түзетулерді үшінші оқылымда мақұлдады. Заң жобасы ата-аналардың өз балаларына қатысты алименттік міндеттемелерді орындамағаны немесе толық орындамағаны, сондай-ақ кәмелетке толған еңбекке қабілетті балалардың материалдық көмекке мұқтаж қарт ата-аналарын асыраудан жалтарғаны үшін жазаны қатайту мақсатында әзірленген.
Өскемен қаласында мамандандырылған ХҚО қызметкерлері жүргізуші куәлігіне емтихан тапсырғандарға көмек көрсетеміз деп 40 млн теңгеге жуық сыйақы алған. Алайда бұл заңсыз әрекеттері әшкере болып, сотқа тартылды.
Өзбекстан президенті республикадағы 4 мың шақырым жолды ретке келтірмек. Мирзиеев халықаралық жолдардың жағдайы республиканың сыртқы саудасы үшін үлкен маңызға ие екенін атап өтті. Өзбекстан президенті елдегі халықаралық жолдардың 4 мың шақырымын жаңғыртуды жоспарлап отырғанын мәлімдеді. Жол инфрақұрылымын дамытудың тұсаукесерінде ол Әндіжанды Кунградпен және Термезді Ташкентпен байланыстыратын бағыттарды жоғары сапа стандарттарына жеткізудің маңыздылығын атап өтті.
НАТО бас хатшысы Қытайды «Ресейдің Украинаға қарсы соғысының сыбайласы» деп атады. Марк Рютте Брюссельде Украина президенті Владимир Зеленскиймен бірлескен баспасөз мәслихатында «ҚХР екі жақты мақсаттағы тауарларды жеткізу арқылы санкцияларды айналып өтіп, Ресейдің әскери күш-жігерін қолдайды» деді.
Қырғызстан Apple және Pfizer компанияларымен ынтымақтастықты нығайтуға ниетті. Келіссөздер аясында серіктестікті дамыту және барлық салада инновациялық технологияларды енгізу туралы шешім қабылданды. Қырғызстан үкіметінің басшысы Ақылбек Жапаров америкалық жетекші компаниялар мен ұйымдардың өкілдерімен бірқатар маңызды кездесулер өткізді.